தொலைந்துபோன கடவுச்சீட்டிற்குப் பதிலாக புதிய கடவுச்சீட்டிற்கான விண்ணப்பம்

• முறைப்பாடு செய்தல்: கடவுச்சீட்டு தொலைந்துவிட்டாலோ அல்லது திருடப்பட்டாலோ, உடனடியாக அருகிலுள்ள பொலிஸ் நிலையத்தில் முறைப்பாடு செய்து, பொலிஸ் அறிக்கையை (Police Report) பெற்றுக்கொள்ள வேண்டும்.

• கடவுச்சீட்டு தொலைந்தாலோ அல்லது திருடப்பட்டாலோ, அதனைப் பற்றிய தகவலை உடனடியாக தொடர்புடைய அதிகாரிகளுக்கு அறிவிப்பது கடவுச்சீட்டு உரிமையாளரின் பொறுப்பாகும். அவ்வாறு அறிவிக்கத் தவறினால், தொலைந்த அல்லது திருடப்பட்ட கடவுச்சீட்டு சட்டவிரோத நடவடிக்கைகளுக்கு பயன்படுத்தப்படக்கூடும். அத்தகைய சந்தர்ப்பத்தில், குற்றத்திற்கு உடந்தையாக இருந்ததாக அல்லது உதவியதாக உரிமையாளர் சட்டரீதியாகப் பொறுப்பேற்க நேரிடலாம்.

• இலங்கையின் தூதரகங்கள், தொலைந்த அல்லது திருடப்பட்ட கடவுச்சீட்டுகளின் விபரங்களை அவற்றை இரத்து செய்வதற்காக இலங்கை குடிவரவு மற்றும் குடியகல்வு திணைக்களத்திற்கு அனுப்பிவைக்கும்.

Lost or Stolen Passport Desk

Department of Immigration and Emigration

“Suhurupaya”

Battaramulla, Sri Lanka

• தொலைந்ததாக அல்லது திருடப்பட்டதாக அறிவிக்கப்பட்ட கடவுச்சீட்டை இனி பயணத்திற்குப் பயன்படுத்த முடியாது. தவறாக பயன்படுத்தப்படுவதைத் தடுக்கும் நோக்கில், அந்தக் கடவுச்சீடு இரத்து செய்யப்பட்டுள்ள விபரங்கள் தானாகவே பகிரப்படும். குறிப்பாக முறைப்பாடு செய்த பின்னர், தொலைந்த அல்லது திருடப்பட்ட கடவுச்சீட்டு பின்னர் கிடைத்தாலும், அதனை மீண்டும் பயன்படுத்தக் கூடாது. அசௌகரியங்களைத் தவிர்ப்பதற்காக, புதிய கடவுச்சீட்டை உடனடியாகப் பெற்றுக்கொள்ளுமாறு கடவுச்சீட்டு உரிமையாளருக்கு வலியுறுத்தப்படுகிறது.

• தொலைந்ததாக அல்லது திருடப்பட்டதாக அறிவிக்கப்பட்ட கடவுச்சீட்டு பின்னர் கிடைத்தால், அதனை உடனடியாக தூதரகத்திற்கோ, அருகிலுள்ள கொன்சுலர்அலுவலகத்திற்கோ அல்லது இலங்கையில் மேலே குறிப்பிடப்பட்ட முகவரிக்கோ அனுப்பி வைக்க வேண்டும்.

1. தொலைந்த அல்லது திருடப்பட்ட கடவுச்சீட்டு வைத்திருப்பவருக்கு இரண்டு தெரிவுகள் உள்ளன:

• அவசரகால / அடையாளப் பயண ஆவணத்திற்கு (Emergency / Identity Document) விண்ணப்பித்தல். இது இலங்கைக்கு திரும்புவதற்காக மட்டுமே பயன்படுத்தக்கூடிய, ஒரு வழிப் பயண ஆவணமாகும். இதன் செல்லுபடியாகும் காலம் ஒரு (01) மாதம் ஆகும்.

• புதிய கடவுச்சீட்டிற்கு விண்ணப்பித்தல். இவ்வாறான சந்தர்ப்பத்தில், கீழே குறிப்பிடப்பட்டுள்ள தேவைகளுடன் சேர்த்து, புதிய இலங்கை கடவுச்சீட்டிற்கு விண்ணப்பிப்பதற்கான அனைத்து குறிப்பிட்ட தேவைகளும் பொருந்தும். (புதிய கடவுச்சீட்டை வழங்கும் அதிகாரம் இலங்கை குடிவரவு மற்றும் குடியகல்வு திணைக்களம் (கொழும்பு) ஆகும். எனவே, முழுமையாக பூர்த்தி செய்யப்பட்ட விண்ணப்பம் சமர்ப்பிக்கப்பட்ட நாளிலிருந்து புதிய கடவுச்சீட்டை வழங்குவதற்கான மொத்த செயலாக்க காலம் பொதுவாக 8–12 வாரங்கள் ஆகும்.)

தகுதி: பிரான்ஸ், ஸ்பெயின், போர்த்துக்கல், மொனாக்கோ மற்றும் அன்டோராவில் வசிக்கும், பிறப்பின் மூலம் அல்லது பதிவின் மூலம் இலங்கை குடியுரிமை பெற்ற விண்ணப்பதாரர்.

யார் விண்ணப்பிக்கலாம்? பிரான்ஸ், ஸ்பெயின், போர்த்துக்கல், மொனாக்கோ மற்றும் அன்டோரா ஆகிய நாடுகளில் பொருத்தமான வகையில் நிரந்தர வதிவிடச் சான்றிதழ் (Permanent Resident Certificate) அல்லது செல்லுபடியாகும் விசா வைத்திருப்பவர்.

இதற்கு எவ்வளவு காலம் எடுக்கும்? புதிய கடவுச்சீட்டை வழங்கும் அதிகாரம் இலங்கை குடிவரவு மற்றும் குடியகல்வு திணைக்களம் (கொழும்பு) ஆகும். எனவே, முழுமையாக பூர்த்தி செய்யப்பட்ட விண்ணப்பம் சமர்ப்பிக்கப்பட்ட நாளிலிருந்து புதிய கடவுச்சீட்டை வழங்குவதற்கான மொத்த செயலாக்க காலம் பொதுவாக 4–6 மாதங்கள் ஆகும்.

பொதுவாக, தூதரகம் முழுமையாக பூர்த்தி செய்யப்பட்ட விண்ணப்பங்களை வெளிநாட்டு அலுவல்கள் அமைச்சின் மூலம் தூதரகப் பை (Diplomatic Bag) வழியாக குடிவரவு மற்றும் குடியகல்வு திணைக்களத்திற்கு அனுப்பும்.

குறிப்பிட்ட காலத்திற்குள் கடவுச்சீட்டு வழங்கப்படும் என்பதை தூதரகம் உறுதி செய்ய முடியாது.

புதிய கடவுச்சீட்டிற்கு விண்ணப்பிக்கும் இரண்டு வழிகள்:

1. பிரான்ஸில் உள்ள இலங்கைத் தூதரகத்திற்கு நேரில் வருகை தந்து விண்ணப்பித்தல் - Embassy of Sri Lanka in France, 16 Rue Spontini, 75016 Paris. தூதரகத்திற்கு நேரில் வருகை தருவதற்கு முன், இணையம் மூலம் நேரத்தை (Appointment) முன்பதிவு செய்யவும்.

1.  தேவையான அனைத்து ஆவணங்களையும் தபால் மூலம் அனுப்புதல். Embassy of Sri Lanka in France, 16 Rue Spontini, 75016 Paris

விண்ணப்பம், அசல் ஆவணங்கள் (கீழே குறிப்பிடப்பட்டுள்ளபடி), தற்போதைய கடவுச்சீட்டு, அசல் ஆவணங்களின் நகல்கள், புகைப்படங்களுடன் கூடிய சான்றொப்பமிடப்பட்ட விண்ணப்பங்கள் (பிரான்ஸ் நோட்டரி / சட்டத்தரணி அல்லது தொடர்புடைய நகர அலுவலகம் அல்லது இலங்கை கௌரவத் தூதுவரால் சான்றொப்பமிடப்பட்டவை), வங்கி பரிமாற்ற ரசீது மற்றும் சுய முகவரியிடப்பட்ட, முத்திரையிடப்பட்ட ஒரு (01) உறை ஆகியவற்றை அனுப்பலாம்.

முக்கிய குறிப்புகள்:

1. தபால் மூலம் அனுப்பப்படும் கடவுச்சீட்டுகள் மற்றும் ஏனைய ஆவணங்களுக்கு ஏற்படும் எந்தவொரு சேதம் அல்லது இழப்பிற்கும் தூதரகம் பொறுப்பேற்காது.
2. குறிப்பிட்ட தூதரகச் சேவைக்குத் தேவையான அனைத்து ஆவணங்களும் பூர்த்தி செய்யப்பட்டுள்ளன என்பதை தூதரகத்தின் கொன்சுலர் பிரிவு உறுதிப்படுத்தும் வரை, விண்ணப்பதாரர்கள் எந்தவொரு தூதரகக் கட்டணத்தையும் தூதரக வங்கிக் கணக்கிற்கு மாற்றவோ அல்லது வைப்புச் செய்யவோ கூடாது.
3. ரசீது வழங்கப்பட்ட பின்னர், எந்தவொரு சூழ்நிலையிலும் கட்டணங்கள் மீள வழங்கப்படமாட்டாது.

நியமன நேரத்தில் (Appointment) தூதரகத்திற்கு வருகை தரும் போது, பின்வரும் ஆவணங்களை கொண்டு வரவும்:

தேவையான ஆவணங்கள்:

• இணையவழியாக “K35A” வெளிநாட்டு விண்ணப்பப் படிவத்தை பூர்த்தி செய்து அச்சிடுக. கடவுச்சீட்டு விண்ணப்பத்தை பூர்த்தி செய்வதற்கான வழிமுறைகளைப் பின்பற்றவும்.

• கடவுச்சீட்டு புகைப்படங்களை சமர்ப்பிக்க வேண்டும். 

குறிப்பிடப்பட்டுள்ள தேவைகளைப் பூர்த்தி செய்யாத எந்தவொரு புகைப்படத்தையும் தூதரகம் நிராகரிக்கும்.

• அசல் பிறப்புச் சான்றிதழ் மற்றும் அதன் தெளிவான நகல். பதிவாளர் நாயகம், மாவட்டப் பதிவாளர் அல்லது பிரதேசப் பதிவாளர் ஆகியோரால் கடந்த 06 மாதங்களுக்குள் வழங்கப்பட்ட அசல் பிறப்புச் சான்றிதழ்கள் மட்டுமே ஏற்றுக்கொள்ளப்படும். மூன்றாம் தரப்பினராலும் அல்லது மொழிபெயர்ப்பாளர்களாலும் அத்தாட்சிப்படுத்தப்பட்ட நகல்கள், இலங்கை குடிவரவு மற்றும் குடியகல்வு திணைக்களத்தினால் ஏற்றுக்கொள்ளப்படமாட்டாது.

• அசல் குடியுரிமைச் சான்றிதழ் மற்றும் அதன் தெளிவான நகல் (விண்ணப்பதாரர் இலங்கைக்கு வெளியே பிறந்திருந்தால் மட்டும்). இது இலங்கை குடிவரவு மற்றும் குடியகல்வு திணைக்களத்தினால் வழங்கப்பட்ட குடியுரிமைச் சான்றிதழாக இருக்க வேண்டும். குடியுரிமைக்கான கட்டணம் செலுத்திய ரசீதின் நகல், முதல் தடவையாக கடவுச்சீட்டிற்கு விண்ணப்பிக்கும் சந்தர்ப்பத்தில் மட்டும் ஏற்றுக்கொள்ளப்படும்.

குறிப்பு: இலங்கைக்கு வெளியே பிறந்த விண்ணப்பதாரர் 21 வயதை அடைந்திருந்தால், இலங்கை குடியுரிமையைத் தொடர்வது தொடர்பான பதிவு (Endorsement) குடியுரிமைச் சான்றிதழின் (citizenship certificate) பின்புறத்தில் இடம்பெற்றிருக்க வேண்டும். அந்த பதிவுடன் கூடிய குடியுரிமைச் சான்றிதழை சமர்ப்பிக்க வேண்டும். (அந்த பதிவு (Extension/Endorsement) இல்லையெனில், இலங்கை குடியுரிமையை நீட்டிக்கவில்லை என்பதை உறுதிப்படுத்தும் சத்தியப்பிரமாணப் பத்திரம் (Affidavit) ஒன்றை சமர்ப்பிக்க வேண்டும். இந்த சத்தியப்பிரமாணப் பத்திரத்தை தூதரகம் வழங்கும்.)

• அசல் திருமணச் சான்றிதழ்: திருமணத்திற்குப் பிந்தைய குடும்பப் பெயரை (Married Name) பெற விரும்பினால், திருமணச் சான்றிதழை சமர்ப்பிக்க வேண்டும். அது பிற மொழியில் இருந்தால், அதன் ஆங்கில மொழிபெயர்ப்பையும் சமர்ப்பிக்க வேண்டும். (பெண் விண்ணப்பதாரர்களுக்கு மட்டுமே பொருந்தும்.) (மற்ற தரப்பினரால் அத்தாட்சிப்படுத்தப்பட்ட நகல்கள் மற்றும் மொழிபெயர்ப்புகள் ஏற்றுக்கொள்ளப்படமாட்டாது.)

• விவாகரத்து செய்யப்பட்டிருந்தால், புதிய கடவுச்சீட்டிலும் கணவரின் குடும்பப் பெயரைத் தொடர்ந்து பயன்படுத்த விரும்பினால், நீதிமன்ற உத்தரவின் அசல் மற்றும் அதன் நகலை கட்டாயமாக சமர்ப்பிக்க வேண்டும்.

• தேசிய அடையாள அட்டை. அசல் தேசிய அடையாள அட்டையை சமர்ப்பிப்பது கட்டாயமாகும். தேசிய அடையாள அட்டையின் நகல் மட்டும் இருந்தால், அசல் அடையாள அட்டையை சமர்ப்பிக்க முடியாததற்கான காரணத்தை விளக்கும் கடிதம் ஒன்றை சமர்ப்பிக்க வேண்டும்.

• விண்ணப்பதாரர் இரட்டைக் குடியுரிமை பெற்றவராக இருந்தால் அசல் இரட்டைக் குடியுரிமைச் சான்றிதழ் மற்றும் அதன் நகல். வெளிநாட்டு கடவுச்சீட்டின் அசல் மற்றும் அதன் தகவல் (Data) பக்கத்தின் நகல்.

• விண்ணப்பதாரர் தனது தொழில் / பணி (Profession, Job / Occupation) விவரத்தை கடவுச்சீட்டில் சேர்க்க விரும்பினால் அசல் வேலைவாய்ப்புச் சான்றிதழ் (Certificate of Employment). தொழில்முறை அல்லது கல்விச் சான்றிதழ்கள் மற்றும் அவற்றின் நகல்கள்.

• குடியேற்ற (Immigrant) விசா: செல்லுபடியாகும் குடியேற்ற விசாவின் அசல் மற்றும் அதன் நகல். (குடியேற்ற விசா இல்லையெனில், பிரான்ஸ் வெளிவிவகார அமைச்சினால் சட்டபூர்வமாக்கப்பட்ட ஆவணம் அல்லது Refugee Renounce Letter-ஐ சமர்ப்பிக்க வேண்டும்.)

• செல்லுபடியாகும் விசா இல்லாத நிலையில், வேறு எந்த வெளிநாட்டு குடியுரிமையையோ, அகதி (Refugee) அல்லது புகலிடம் (Asylum) அந்தஸ்தையோ பெறவில்லை என்பதை உறுதிப்படுத்தும் சத்தியப்பிரமாணப் பத்திரம் ஒன்றை சமர்ப்பிக்க வேண்டும். (இந்த சத்தியப்பிரமாணப் பத்திரத்தை தூதரகம் வழங்கும்.)

• பொலிஸ் அறிக்கை (Police Report): முந்தைய கடவுச்சீட்டு தொலைந்திருந்தாலோ அல்லது திருடப்பட்டிருந்தாலோ, பொலிஸ் அறிக்கையை சமர்ப்பிக்க வேண்டும். (அந்த அறிக்கையில் தொலைந்த அல்லது திருடப்பட்ட கடவுச்சீட்டின் இலக்கம் குறிப்பிடப்பட்டிருக்க வேண்டும்.) கிடைக்குமானால், தொலைந்த / திருடப்பட்ட கடவுச்சீட்டின் தகவல் (Personal Data) பக்கத்தின் நகலையும் சமர்ப்பிக்க வேண்டும்.

• முந்தைய கடவுச்சீட்டின் அசல் அல்லது நகலை சமர்ப்பிக்க முடியாததற்கான சத்தியப்பிரமாணப் பத்திரம் (Affidavit). கடவுச்சீட்டின் தகவல் (Data) பக்கத்தின் நகல் இல்லையெனில், நோட்டரி ஒருவரால் அத்தாட்சிப்படுத்தப்பட்ட சத்தியப்பிரமாணப் பத்திரத்தைப் பெற்று, அதனை ஐரோப்பா மற்றும் வெளிவிவகார அமைச்சினால் சட்டபூர்வமாக்கி சமர்ப்பிக்க வேண்டும்.

• குறிப்பு: சத்தியப்பிரமாணப் பத்திரத்தை (Affidavit) தூதரகத்திலிருந்து பெற்றுக்கொள்ளலாம் அல்லது தூதரகத்தின் இணையத்தளத்திலிருந்து பதிவிறக்கம் செய்யலாம்.

கட்டணம் செலுத்தும் முறை

• விண்ணப்பதாரர் தூதரகத்திற்கு நேரில் வருகை தரும் போது, பணமாகவோ, கடன் அட்டையிலோ (Credit Card) அல்லது பற்று அட்டையிலோ (Debit Card) பணம் செலுத்தலாம். தனிப்பட்ட அல்லது நிறுவன காசோலைகள் ஏற்றுக்கொள்ளப்படமாட்டாது. இலங்கை அரசாங்கத்தின் விதிமுறைகளுக்கு அமைவாக, கடன் அட்டை அல்லது பற்று அட்டை மூலம் மேற்கொள்ளப்படும் அனைத்து கொடுப்பனவுகளுக்கும் கூடுதலாக 5% சேவைக் கட்டணம் அறவிடப்படும் என்பதை தயவுசெய்து கவனத்தில் கொள்ளவும்.
• தொடர்புடைய கட்டணத்தை பிரான்சில் உள்ள இலங்கைத் தூதரகத்தின் வங்கிக் கணக்கிற்கு நேரடி வங்கி பரிமாற்றம் (Bank Transfer) மூலம் செலுத்த விரும்பும் விண்ணப்பதாரர்கள், அதற்கான முன்கூட்டிய வழிமுறைகளைப் பெற்றுக்கொள்வதற்காக தூதரகத்தைத் தொடர்புகொள்ளுமாறு அறிவுறுத்தப்படுகிறார்கள்.

கட்டணங்கள்

முக்கிய குறிப்புகள்

• உத்தியோகபூர்வ ரசீது வழங்கப்பட்ட பின்னர், எந்தவொரு சூழ்நிலையிலும் கட்டணங்கள் மீள வழங்கப்படமாட்டாது.

• மொழிபெயர்ப்புகள் அசல் ஆவணங்களாக ஏற்றுக்கொள்ளப்படமாட்டாது. அனைத்து நகல்களும் A4 அளவிலான தாளில் இருக்க வேண்டும்.

• தூதரகம் அனைத்து ஆவணங்களையும் அத்தாட்சிப்படுத்தி, அசல் ஆவணங்களை விண்ணப்பதாரரிடம் திருப்பி வழங்கும்.
• குழந்தையின் பெயரை பெற்றோரின் கடவுச்சீட்டிலிருந்து நீக்க வேண்டியிருந்தால், பெற்றோரின் கடவுச்சீட்டுகள் சமர்ப்பிக்கப்பட வேண்டும்.

• பெற்றோர் தங்களது குழந்தை அல்லது குழந்தைகளுடன் சேர்த்து புதிய கடவுச்சீட்டிற்கு விண்ணப்பிக்கும் சந்தர்ப்பத்தில், பெற்றோரின் கடவுச்சீட்டிலிருந்து குழந்தையின் விவரங்களை நீக்க வேண்டிய அவசியமில்லை; ஏனெனில் பெற்றோருக்கு புதிய கடவுச்சீட்டுகள் வழங்கப்படும்.

• விண்ணப்பதாரர் அவசர அடிப்படையில் (Express Courier Service, Speed Post போன்ற சேவைகள் மூலம்) ஆவணங்களை அனுப்ப அல்லது பெற்றுக்கொள்ள வேண்டுமெனில், அதற்கான ஏற்பாடுகளை அவர் தனிப்பட்ட முறையில் மேற்கொள்ள வேண்டும்.

• தபால் அல்லது கூரியர் சேவையின் மூலம் ஆவணங்கள் தொலைந்தாலோ அல்லது தாமதமானாலோ, அதற்கான எந்தவொரு பொறுப்பையும் தூதரகம் ஏற்காது.